Tunglið eða máninn er eini náttúrulegi fylgihnöttur jarðarinnar og nálægasta fyrirbæri himinsins ef frá eru talin geimför og gervitungl. Tunglið er bjartasti hnötturinn á næturhimninum og sá eini þar sem við getum skoðað landslagið með berum augum. Tunglið snýr alltaf sömu hlið sinni að Jörðinni. Þess vegna sjáum við ætíð sama landslagið á tunglinu, sama hvenær við horfum á það — eini munurinn er frá hvaða horni sólin lýsir upp yfirborðið. Annað slagið eru sólin, jörðin og tunglið í því sem næst beinni línu. Þegar það gerist getur jörðin varpað skugga á tunglið eða tunglið skugga á jörðina. Slíkir atburðir nefnast myrkvar og eru með fallegustu stjarnfræðilegu sjónarspilum sem sjá má með berum augum.
(Sævar Helgi Bragason, 2011)
(Sævar Helgi Bragason, 2011)